De Drakenmoder of den Nachtekönink: wee wint Game of Thrones?

Kün y ouk neet wachten töt den 14. april? Alwear et achtste seisoon (my dücht, HBO) steyt vöär de döäre en se hebbet natuurlik mooi spanning upbouwd de lätste twey jår.

Westeros steyt up et pünt dumpeld te worden in nen stryd tüsken yskonynen en vüürvreaters. Dat wördt bloderig, kün y dunder up seggen.

As eyrste mag natuurlik düdelik weasen dat et der in GoT meysttyds nit sachtsinnig to geyt. Publikslevelingen wordet snoihard afeslacht. Der is kwåd blood esat, argernissen en unvereffende reakeningen links en rechts. Dat kümt in Game of Thrones’ lätste (toch, HBO?) seisoon flink an de koak in et algevecht, de eyndstryd. Mär wee maket de meyste kans up de winst? Låt wy se eyne vöär eyne es by langes gån.

Daenerys Targaryen

Up kop geyt Daenerys. (foto: HBO)

Up papyr hevt see allens med. De Dothraki-paerdekearls, et leyger van de Unbevlekten, twey öäh… draken van draken en dan noch de vereynigde Noordervolker under Jon Snow, den as et vöärige seisoon vöär öär döär de kneyene güng. Toch wördt et gin kold künstjen (haha). See hevt swören wat an de Witte Dwellers te doon en dee hebbet nu selv ouk nen draak. En Cersei hevt dan wal beloavt üm hülptroppen te stüren, mär dat müt wy dan noch mär seen. Selvs as et de Drakenmoder lükket, blivt der weinig oaver üm oaver te regeren.

Kans van slagen: årdig töt middelmåtig. Mär töt nu to hevt se ydereyne noch ümme kreagen. Düs wårüm neet, ja?

Cersei Lannister

Vernemstig vröwken… Cersei. (foto: HBO)

De lätste paar seisonen hevt se neet vöäle kameröäde meyr oaver. Mär toch doot öäre teagenstanders der good an üm te untholden dat de lätste ossens dee öär underskatteden nen duukvlucht makeden van de müren van Kings Landing. Et hevt öär al nen generaal ekosted (Jaime), nen bröder (Jaime) en den vader van öär ungeböärene kind (alwear Jaime). Toch hevt see et strategisk noch neet so slecht. As Daenerys en Jon sik in et noorden låt afhauen döär de Witte Dwellers, kan see der achteran so noch eaven oaverhen walsken. En see hevt Euron Greyjoy med syne skeype noch, de Mountain, en de hüürlingen van de Goldene Kompagny. Neet slecht vöär eyne den – en låt wy eyrlik weasen – heylemål nit so leev is. Vernemstig menske, dee Cersei.

Kans van slagen: Groot. See is de eanigste vrouwe up de wearld den as al angstanjagend is med een glas wyn in de hande. En een anagram van Cersei is Ceiser.

Jon Snow

Jon löt sik selvs döär de dood neet teagenholden. (foto: HBO)

As et Jon en Daenerys lükket üm beide de Witte Dwellers en Cersei te oaverleaven, sal Jons eyrgevööl üm ingeaven dat hee wear döär de kneyene geyt vöär de Drakenmoder. Klein andachtspünt: Jon syne olders. Jon heat eygens Aegon Targaryen en is – wo gearne as Dany et ook van sikselv meynet – den eanigsten rechtmåtigen upvolger van den prikstool. Et kan mär so up dunderye uutlopen as dit ungemakkelike weatken an et lecht kümt. As Dany et neet kan nåvertellen, müt hee et teagen Cersei alleyne upknappen. Of hee kan natuurlik med Dany trouwen, wat neet heylemål süver is, mär neet heyl ungebrukelik in Westeros, so as wy weatet.

Kans van slagen: Stark (haha). Hee is al es dood eweasd (of noch altyd?), düs wy müt noch seen of de Nachtekönink wat teagen üm kan beginnen.

Gendry

Gendry kan hard hauen, mär steyt der wal alleyne vöär. (foto: HBO)

Den eanigsten van Robert Baratheon syn någeslacht den nit döär Joffrey is afeslacht. Dissen smid annex knappen wöösteling hevt sik by Huus Stark an eslöäten, mär wat as dee nu allemål uut de tyd köämen? Wat as der gin Targaryens of Lannisters meyr sint? En wat as alle anderen gekke Henkie nit wilt weasen of anderssins druk sint? Dan mus Gendry når vöärten treaden.

Kans van slagen: as y kyket wee der allemål eyrst uut de tyd müt… mwå.

Den Nachtekönink

Dår word y toch kold van… (foto: HBO)

Al dat genöäl oaver wee as der up ne dumme püntige trone mag sitten… Et geyt nargens oaver as den Nachtekönink een kold slat oaver Westeros trekket en ydereyne vermoordet, nen uneyndigen ystyd in gang set en de heyle menskheid kapotvrös. Is et grote beyldspråke vöär wo uuteyndelik polityk, geld en macht totaal meyningsloos sint as der sik ne grote natuurramp vöärdüt? Låt et Baudet neet höyren.

Kans van slagen: Hoge. Een eynde wår as ydereyne kapot geyt is wal heyl typisk Game of Thrones.

De Hound

Knarrigen eynling, goden vechter. Blivt hee oaver? (foto: HBO)

As et der enkel üm geyt wee as der noch oavereynde steyt as et vechten klår is, dan is et de Hound, ja?

Kans van slagen: Laege. Hee müt noch üm syn bröder hen.

Arya

Kan Arya öäre gedöäntewesselingen gebruken? (foto: HBO)

Ned Starks dochter hevt altyd een oaverleavingsinstinkt låten seen. Terwyl as öären ‘bröder’ Jon en ydereyne druk is üm sik butengaats af te låten slachten, hevt Arya de dood ouk al es in de ougen eseen. Dat kan he mooi gebruken. Toch is Arya vöäral druk med wraak neamen up de dood van syn vader. Tja. En as et lystken afwarked is, wat dan?

Kans van slagen: Wat wul y toch beginnen med uwe breinålde?

Bronn

Bronn is vry. Hevt hee noch sin an vechen? (Foto: HBO)

Y köänet natuurlik de Yserne Trone winnen döär veldslagen. So hevt et Robert Baratheon ouk edån, ja. Mär seet Jaime King’s Landing verlåten hevt, is Bronn vry man. Hee kan syn måt achternå. Of hee versamelt alle suldåten dee üm noch loyaal sint en neamt et Rode Fort in. Underwyl sint Jon en Dany gangs üm sikselv uut te dünnen in et noorden. Bronn kan dan gewoon Cersei’s oorsprunkelike plan döärsetten, mär dan vöär sikselv.

Kans van slagen: Neet heyl groot, helaas.

Tyrion

Et kleine männeke med et groute verstand (en dörst) höldet sik töt nu to good in al et geweld. Hee glipt oaveral makkelik tüskendöär. En terwyl as hee et allemål mooi van afstand löt geböären, is hee wal de volgende in de Lannister-lyne, vöär et geval as Cersei et neet kan nåvertellen. Dårby kan hee good med den slauen Hear Varys, den as oaveral wear wat handige lüde kennet.

Kans van slagen: minimaal. Hee hevt eynmål låten seen dat hee med ne krüüsboage oaverweg kan, mär as et der up ankümt, maket se em so (noch) een köpken kleiner.

Samwell Tarly

Ach Sam, y sint te good vöär disse wearld. (foto: HBO)

Ümdat u mangs leevde en vreendelikheid et wydste brengt, ja?

Kans van slagen: Och, skei toch uut.


Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.