Möägelik ouk bröder van eykenprocessyrupe når Neaderland
De eykenprocessyrupe behearsket de lätste månden et nys. Mär ouk syn bröder likt disse kante up te koamen: de dannenprocessyrupe. Dat düt Bastaan Meerburg, direktöör vöär et neaderlandske Kennis- en Adviescentrum Dierplagen uut de döke.
“Wy weat alleyne nit wo rap as se koamet,” segt Meerburg. De rupe is under andere seen in Switzerland, Spanje en up de grense tüsken Belgie en Frankryk. “Dan is Neaderland (en Noord-Düütskland – WS) neet so wyd meyr.” Of et döär klimaatverandering kümt, dörvet Meerburg nit te seggen. “Dee ård verbanden leggen is altyd lastig.”
De dannen- en eykenprocessyrupen lyket up mekander, mär et gröätste verskil blikt al uut de name. De dannenprocessyrupe sit vöäral in nåldböyme, so as de danne. Wydters doot se vöäle etselvde: se leavt in grupen en maket nöste. Met mekander vreatet se nen boum kaal en gåt dan in nen uptocht når den volgenden boum.
Eyn miljoon höärkes de rupe
Vöär beide rupen geldet dat de höärkes flinke jöäkerye veroorsaket. et underskeid is dat de dannenrupe een miljoon höärkes hevt en de eykenrupe ‘slechts’ 700.000. “Of dat meyr oaverlast gevt, weat wy nit,” segt Meerburg. Wo vöäle oaverlast der in Neaderland en Düütskland van kümt is ouk noch nit te seggen. “Et soort klacht sal wårskynlik etselvde weasen.”
De klachten dee de höärkes veroorsaket, sint etselvde as by de eykenprocessyrupe: jöäke, bülten en ougklachten. Et belangrykste üm klachten teagen te gån is se vöärkoamen, weat Meerburg. “Koamt neet te kort an de nösten en versöökt se vöäral nit selv vort te halen.”
Nit ydere rupe is eaven slim
Ouk is noch nit düdelik in wat vöär tyd van et jår de oaverlast kümt (as se töt hyr uptrekket). Dat is in yder land in Europa verskillend. “In wöärmere landen begint se an et eande van januåry med loupen. In Neaderland verwachtet wy dat et ungeveyr as in Frankryk sal gån, wår se meysttyds in februåry of maert begint.”
Stel dat se hyrhen koamet, hoovt wy uns noch nit druk te maken. Der sint al andere rupen med brandhöäre, wår wy in Neaderland gin problemen med hebbet, so as de bastaardsatynrupe. Den hevt ouk brandhöäre, mär dår hebbet lüde döär mekander gin skrik van.
