Bökkers’ Leaven in de Brouweri-je: lekker pleyren en nit nöälen

Leaven in de Brouweri-je hevt een starke upkoamst. De sample van Hollywoods Tarzan-jodel an et begin van Evolutie is nen strydkreet vöär nen oavend steavig supen. So nen oavend wår rechtuut kyken vöärdan lastiger wördt en wy enkel noch lallend van stuuprande når stuuprande up huus an köanet.

Nit nöälen, rock ‘n’ roll muss sein, likt et motto van Bökkers syne nye plate. Med een döärsneyde tempo tüsken de 130 en 160 BPM is et 37 minuten lange ne stampende ode an feestvyren, want “a’j körig nettys leavt, kü’y ouk körig nettys dood.

Doo as Normaal en Jovink der med uutskeiden löyten se ne tekstuele töymigheid achter dee byvöärbeyld et al öldere drentske Mooi Wark net nit in kun neamen. Bökkers kümt med verneamstige, Jovink-achtige vündste so as “Wy gåt oaver töt de orde van de nacht”. Et is et samengån van disse språkwille en de ervaren pleyrderye wårmed se sik rechtstreyks når de vöärste ryge van de neadersassiske rock & roll-beweyging elleboaget.

As ik in de kroog es wat versyr
duurt dat minstens een kwarteer
Ik kryge niks vöär niks

Disse absurdistiske selvoaverskatting en selvspottende styl is kenmarkende geldersk-oaverysselske humor. Helaas geyt de wat rundere, hese bariton van Bökkers mangs wat verlöären in de mix, wårdöär hee up wat steydes wat lastig te verstån is. Mär de strakke dreestemmige zang maket vöäle good.

Toch låt se et up Leaven in de Brouweri-je wat liggen up underskeidendheid. Van et titelleed leaven in de brouweri-je en Nachtdienst, Orde van de Nacht en hekkensluter Kats noar de Kloten, et is de eyne ode an superye nå de andere. Te verwachten med so nen albumtitel, mär 12 nummers lange is ouk wal wat an de alkoholistiske kante. Seaker as y bedenket dat öäre eyrdere platen dår ouk al oaver güngen. Van disse good-upleide musikanten sul y meyr verwachten. Et likt öär allemål wat makkelik af te gån. Viva la Veurjoar löänt selvs swår up ritmes dee låt denken an de Dandy Warhols of de knaller Are you gonna be my girl van Jet. Up sik is dat vöär de neadersassiske scene ouk wal wear vernyend.

Med et sukces van Iederiene hef een reden, de sallandske bewarking van Catch & Release van Matt Simons, untdekkeden Bökkers dat se ouk med langsamer wark wal andacht kryget. Prima untwikkeling. Upvallend mooi tüsken al et gepleyr is dan ouk de ballade Kold Bloed. Hyr kryget wy wear wat med van Bökkers klasse, beide musikaal en tekstueel. Se sint selvs nit bange üm der strykers in te setten.

Wat sal ik der es van maken? Een book of een lydty?
Of loup ik et bos in med een stük touw?
Alleyne al de gedachte dat ik u nooit meyr wearsee,
maket my ungedurig en ik kryg et benauwd.”

Een ander nummer wat der uutspringt is Duutse Grens, ne ode an et oost-neaderlandske volk. Se låt höyren dat se sik good in de beleavingswearld van den döärsneyde plattelandstwintiger verdeped hebbet. “Hyr pråt se plat as of der nymand lüüstert, hyr suupt se beer as of morgen nyt besteyt.” Et is medeyne ouk ne mooie geleygenheid vöär Bökkers üm synen Fender es lekker te låten juusteren.

Vöär et nummer Kats noar de Kloten hebbet se sik låten inspireren döär Normaals Wiet is niet Ver, Net as Gisteren en Ik mos pissen. Under een hoog jalala-gehalte sorget ne ukelele vöär een reggae-achtig nåpikken, med af en too ne herinnering an André van Duins karnavalshit De balletjes van de koningin. Et vråg- en antwoordpatroon en selvs de afslutende lollige rymkes hebbet wy eyrder ehöyrd. Mär dat sal de Bökkers-leevhebber weinig interesseren.

Leaven in de Brouweri-je is een makky vöär Bökkers. Of so as se et selv singt: “weinig ambity, weinig pröätys, wy sölt et hyr up karakter mutten doon.” Toch steakt se med kop en skolders boaven de döärsneyde neadersassenrock uut. Wy wachtet der up dat de jungelüde et up öär blauwtand-speakers drayet as se når skole fytset. Gin heyl vernyend spül, wal lekker üm up te hardloupen.

7,5/10

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.