Ståtenlid: ‘Provincy solde es vaker sassisk doon’

Et bestüür van de Provincy Oaveryssel solde vaker in et sassisk küren in vergåringen. Ståtenlid Dinand Leferink (VVD) uut Goor wil vakerder neadersassisk in de Ståtensale höyren. Binnenkort deent hee ‘n versöök (ne motie) in üm de språke in et provincyhuus up de kaarte te krygen. As et an em ligget, müt dat vanaf tokommende määrt ingån. Dat skrivt RTV Oost, de neaderlandsk-talige ümroup vöär de Provincy Oaveryssel.

By den provincialen råd van Kultuur deade hee syn idee uut de döke. Dår warren se der volgens em good oaver te spreaken. “By de rådssitting stünd et kultuurbeleid 2021-2024 up den kalender. En dårin neamt et neadersassisk ne vöärname steade in.”

Lobby

By de vergåring kundigden Leferink an at hee oaver twey weaken syn versöök by de Provinciale Ståten in geyt denen. “Vöäraf wil ik vanselvs flink den buur up üm meyrdere lüde achter myn plan te krygen. De eyrste reactys van de andere fraktys sint in yder geval al positiv.”

Leferink verwist dårby når de gemeynderåd van Rålte, dee as verleaden vöärjår ouk al in et neadersassisk vergåren deaden. Vanselvs begript hee dat nit alleman et kan. Dårümme müt et ouk vöäral vrywillig blyven. “Up wat vöär ne wyse dan ouk, sovöäle möägelik en vöär wee as et kan, holdet wy de diskussys vöärnamelik in et neadersassisk.”

Identiteit

Leferink meynet at de språke belangryk is vöär de inwoaners van disse provincy: “et is ‘n vöärnaam deyl van de gröytskheid en identiteit van de inwoaners van Oaveryssel. Et verbindet de lüde binnen unse streake of stad. Dat is belangryk. As y plat köänet pråten, müt y et neet låten.”

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.