Knalt u ryke of klook: Fortnite-börse by universiteiten

Fortnite spöllen vöär uwe universitaere study. (Foto: Epic Games/Paul Tassi)

Et unwys populaere skeetspel Fortnite höld de jungelüde werldwyd van de stråte en universiteiten spölt dår händig up in. Se beedt nye studenten nu börsen üm vöär öär Fortnite-team te spöllen, want der is seriöös geld an te verdenen. Dat is te leysen by The Guardian.

Yderene tüsken 8 en 18 jår old sal et underwyl al es probeerd hebben of der minstens van ehöyrd hebben: et unwys populaere online skeetspel Fortnite. Nu as bekendheden en instituten et gåt insetten, krigt et steyds vasteren voot in de samenleyving.

Moorden sunder bloud
In et populaere skeetspel wordt 100 spöllers tegelyke edropped up een eiland en müt se mekaar med geweyren, hamers en alle andere mögelike moordwåpens üm seype helpen. Den lätsten wat oaverblivt, wint. Toch is et spel neet bloderig. Den wat ümbracht wörd, verdwynt simpelweg. Dat is ene van de reydenen dat et so breed espöld wörd. Et spel süt der neet al te leyvensecht uut en der sit nen hoop humor in. De karakters köänt dummige danskes en de makers hebt der selvs nen diskotheek in ebowd.

Rekords
Fortnite brekt alle rekords. Volgens YouTube-gamejournalist Ryan Wyatt hevt et spel nu al de meyste uploads van spelverloopvideo’s in ne månd ooyt. Een rechtstreyks up YouTube uut esünden tournament up 25 meert wör ruum 42 miljuun mål bekekken.

Seriöös prysengeld
De Ashland University uut Ohio geyt nu een Fortnite-team uprichten, so dat de universiteit kan meddoon an de tournamenten. Ouk Missouri Baptist University hevt interesse.

Dat de universiteiten der in duket is neet so gek as y kykt når et prysengeld. Epic Games, et bedryf achter Fortnite, hevt ne slordige $ 100 miljuun (ungevear € 85 miljuun) an belöning upsyd esat.

Ashland University’s e-sportcoach Josh Buchanan saggen de vöärdelen van Fortnite. “Et spel verstarked uwe kreativiteit. En der sit flink wat samenwarkingsmögelikheden in,” sea Buchanan teagen Variety. “As spöller by uns team kryg y coaches en medwarkers üm u wydter te helpen. Neet enkel vöär et spel, mär ouk by uwe study.”

Den nu bekendsten Fortnitespöller en -YouTuber is Tyler ‘Ninja’ Blevins, den as der as ene van de eersten by was üm et live te gån spöllen up YouTube. Et spel besteyt krap een jår, mär Blevins harket når skatting al ungevear $ 350.000 (sowat € 300.000) in de månd binnen an YouTube-inkumsten.

Ouk artysten as Drake en Travis Scott sint fervente spöllers. Sporters pryst et kompetityve element in et spel. Vootbalspöllers neamt selvs de danskes oaver van winnende Fortnite-karakters üm duulpünten te vyren.

Töt nu to likt et spel vöäral unskuldig tydverdryf, med seriöse inkumsten. Reyden vöär panyk sowyso neet.

Black Mirror in China: online ranglyste bepålt uw huusanbod, reysekansen en vreanden

Dallas Howard as Lacie in Nosedive (foto: Telegraph.co.uk)

In Nosedive, ne afleavering van Netflix-ryge Black Mirror, spölt Bryce Dallas Howard een karakter Lacie. Ne vrowe dee höger up de sociale ranglyste wil kommen, döär ne gode indruk achter te låten up de bruudloft van ne jöögdvrindin. In disse afleavering wörd öären rang bepåld döär ne app, wårmed löde mekaar steeds pünten geavt.

Wu höger in rang de löde sint wår as Lacie med üm geet en wu högere pünten löde öär geavt (4,5 of mear uut 5 pünten), wu mear as Lacie in anmarking kümt vöär een grötter huus of andere vöärdeelkes. As see öär geduld sul verlesen teagen nen ober of nen winkelbedeenden, of as see med legere rangen eseen wörd, löp öären rang terügge en wörd se butenslöäten van de verfyndere lågen in de samenleaving.

Et tydskrivt Wired skrivt nu oaver Zhima Credit, ne ranglyste vöär “persöönlik kredyt”. Et steet in verband med Alipay, de meestbruukte mobyle betaalwyse in China. De macht van Zhima Credit düt akelig völle denken an de afleavering Nosedive.

Met Zhima Credit krygt brukers tüsken de 350 (leage) en 950 (hoge) pünten. Löde med ‘gode’ pünten krygt vöärdeelkes en belöningen. Skulden aflossen leavert mooye pünten up, mär ook bepålde kwalifikatys, de dingen dee as y koopt en, belangryk hyr, de löde wår as y med üm gåt.

Skryvster by Wired, Mara Hvistendahl, beskrivt wu see verleaden augustus et systeem bruken en medeen ne “slechte” rang van 550 pünten an de bukse had. Dårdöär mus see € 25,- borg betalen üm ne fytse vöär 12 cent te hüren. Üm GoPro’s of gratis paraplü’s te hüren mus see ook borg betalen. “Ik hören by de digitale underlåge,” skreev Hvistendahl.

Mär et wörd noch mooyer: Zhima Credit steet in verbinding met de Lyste van Unearlike Löde, ne lyste dee de Chineeske regearing byhöld. Dat untdekken journalist Liu Hu. Hee har pünten dee üm ne “Tweederangs Börger” maken, terwyl hee helemål gin profyl had by Zhima Credit. As hee wul reysen wör hee dwars esetten: hee kun enkel de leagere klassen boken up de langsaamste treynen. Hee kun bepålde konsumptygoderen nit kopen en ook gin düürdere hotels boken. Vöär gröttere bankleningen köm hee nit in anmarking.

An de andere kante hadden löde med hoge Zhima Credit-skores allerhande vöärdelen: Lazarus Lui har ne skore van 722. Hee kun güstige vöärwearden afköyeren by leningen en apartementhüür. Up verskeydene dating-apps kreeg hee toogang, as hee en syne vrowe et nöst under ’n boom sullen krygen. Noch een paar pünten der by up en hee kun so een mooy visum når Lüxemburg krygen.

Een andere millenial med ne hoge rangvoring vertellen Hvistendahl dat de rangen van de löde wår y med üm gåt invlood hebt up uw egene pünten: “as uwe vreenden allemål hoge pünten hebt, is dat weer günstig vöär u. Heb y vreanden med minder kredyt, is dat nit best vöär u.”
Hyr leas y et hele verhaal (in et engelsk). De behöörlik nauwkörig vöärspellende afleavering Nosedive vind y up Netflix.


Alice Vincent
15 december 2017
Telegraph.co.uk

Black Panther is den krachtigsten Marvel-film en y müt em seen hebben

Skarmupname van Black Panther
Foto: Vance.nl


Oardeel: 4/5

Veer stearns review

Al sowat twee jår lange krygt wy regelmåtig vöärpröövkes en roddels oaver Marvel’s Black Panther. Et is den eersten Marvelfilm wårin afrikaanske karakters en nen swarten superheld de höövdrolle hebt. De hype is nit vöär niks! Wy köänt u vertellen dat de film u vulledig medsugt in een prachtig, unyk verhaal.

Et vertellen van verhalen med verskeydenheyd der in is nit so mär ne trend: so sit de werld in mekander. Ingewikkeld, depe en nit te hope te smyten in (volkskündige) generalisatys. Hollywood hev jårenlange vasthölden an et idee dat verhalen med heteroseksuele witte männe verkopet. Rechtevoort wilt löde wat anders seen. Brede, good uutdachte films. Dat dwingt see ook af med de knippe.

Verskeydenheyd

Nå 17 Marvel Cinematic Universe films kan Marvel et endelik upbrengen üm Black Panther’s verhaal te vertellen wat zik afspöält nå Captain America: Civil War. Prins T’Challa kümt up huus up an üm syn land te regearen as nyen köning, mär syne anspråke up et köningskap is nit so vaste as hee meand had.

Black Panther was al nen hit vöärdat den film uutköäm. Et sung ja al lange rund up sociale media. Up dit ogenblik wörd verwacht dat den film de eerste 4 dage ungevear 200 miljun dollar geet upsmyten in Noord-Amerika.

Wakanda

By Black Panther is et visueel geneten. De löde, öäre kleader, de traditys, de klöären, de grote stad. Allens süt der prachtig uut in Wakanda, een verduukt hoog-technologisk untwikkeld land in et Oost-Afrika van Marvel. In Wakanda vült olde traditys en hoogstånde technology mekaar an en sluut mekaar nit uut.

Dit steet lynrechte tegenoaver vöäle oavertügingen in Westerse science-fiction. Wakanda is een land wat nit koloniseerd en uut eavenwicht stoaten is döär et Westen. Wakandeeske löde hebt et good en sind gelükkig.

Regissöör van den film is Ryan Coogler, nen afrikaansken amerikaan. Dat vernem y good. De karakters sind völsydig, stereotypen oaver swarte afrikanen gevt et nit. Et verhaal hev een uprecht gevööl weagens Cooglers persöönlike leevde vöär et projekt.

Verhaal vöär spektakel

Wåras völle Marvel-films vöär spektakel gåt, versöcht Ryan Coogler van anvang töt slot den andacht vaste te holden, med wat spektakel der by nöäst. Gin ogenblik verveling.

T’Challa wördt espöld döär aktöör Chadwick Boseman. Nå at T’Challa’s vader uut de tyd is ekömmen, müt hee sikselv bewysen üm den nyen Black Panther te worden. Underwyl dat hee köning wörd, leart T’Challa völle oaver syne verantwoordelikheden en wee as hee weasen wil. Hee leart oaver syne verholding med andere gemeenskappen in Wakanda, syne nöästen en de butenwerld.

Vrågstükke oaver vaderskap, vreandskap, leevde en verbündenheyd van mensken oaver de hele werld komt vöärby. Den film slöt ne brügge tüsken de fantasywerld en de echte werld. Hyrmed wilt de filmmakers de löde deper nå låten denken oaver seriöse vrågstükke, dee med humor en onwys mooye filmbeelden vöörtan vermakelik blivt.

Vyanden

De ård van de vyanden löpt in Black Panther flink uuteen. Ulysses Klaue is nen wåpenhandeler den as dale kikt up löde uut Wakanda. Hee is düdelik nen slechten kerl. Et verhaal achter Erik Killmonger, spöld döär Michael B. Jordan, geet deper. Undanks syne in-slechte dinge, blikt hee toch nen antiheld. Hee meant dat Wakanda üm hev låten vallen, dat se öäre morele plichten nit vervült.

In den film wörd dat good toolicht. Den skeyd tüsken good en kwåd is nit altyd düdelik. Ne saak wat denken düt an Magneto, et karakter uut de X-men-böke en films wat der allens an sul doon üm up te koamen vöär underdrükte ‘mensken’ as heeselv.

Vrouwlöde

De vrouwlöde van Wakanda sind de echte helden van de film. Dit is Marvel’s meest feministisken film töt nu too. Et klookste menske van de werld, Shuri, is T’Challa’s halfzüster en ne vöärname hülpe. De krachtigste krygster in Wakanda, Okoye, is ne vrouwe. De lyfwachters van T’Challa sind vrouwlöde. Vrouwlöde redt de tokumst van Wakanda. Karakters as Nakia (Lupita Nyong’o), Okoye (Danai Gurira), Ramonda (Angela Bassett) en Shuri (Letitia Wright) sorget dat Black Panther den man en superheld is wat hee weasen müt. Sonder öär besteet der ginnen Black Panther.

Wat den film ook stark maakt is et döärbreaken van standaarden en stereotypen in Hollywood. T’Challa is heavig verleevd up Nakia, ne dunkere, swarte vrouwe. De vrouwlöde in Wakanda sind nit stereotype machteloos of enkel hellig. So vertel y uwe egene verhalen.

Afrika

De eanigste anmarking up Black Panther is dat et hele werlddeel Afrika up enen hopen smeaten wörd. Wakanda besteet nit echt, mer et sul mööyer eweast weasen as de bestånde afrikaanske kulturele kenmarken uut verskeydene streaken nit so mär döär mekaar mengd wörden. As vöarbeeld, in de film en in de strip köyert wat löde uut Wakanda de Xhosa-språke, ne språke uut Süüd-Afrika. Mär Wakanda ligt in Oost-Afrika. Disse feytelike unjüüstheden verswakket den film. De språke Swahili had hyr beater past.

Toch geet van alle Marvel-films der vöär my med stryken. Black Panther vyert prachtige löde in een medsleapend verhaal. Et is nen film wår in afrikanen andere afrikanen redt en öär egen leavensloop bepålt. En selvs sun kleyn pünt is al nen groten trad vöäruut in Hollywood. Wakanda Forever!


Bron: Vance.nl
16 february 2018

Dissen beoordeling is oaversat med tostemming van den oarsprunkeliken skryver, Abdi Suleiman.

Drentse Isa Zwart wint püblyksprys up Songfestival vör minderheydsspråken

UDINE (IT) – Sängeresse Isa Zwart (17) uut Emmen hef in et Italiaanse Udine de püblyksprys wünnen up et Europees Songfestival vör minderheydsspråken. De höövdprys was vör den Switser Tumasch è. Dat skrif RTV Drenthe.

Isa Zwart up et Drèents Liedtiesfestival. (Foto: RTVDrenthe.nl)

Gisteråvend trööd Isa Zwart up in Udine met öar Drentse nummer Mamme See. Dårmet wün se verleden mei et Drèents Liedtiesfestival.

As vöörsprekster van et Saksysk mus see tegen söven andere finalisten stryden. Dee süngen in et Baskysk, Welsk, Fryulysk, Oksytaansk, Reto-Romaansk, Bretonsk, Gallysk.

Zwart halen de top dree nit, mer kreeg wal de meeste püblyksstemmen, wuurmet se de püblyksprys binnenhalen. “Echt machtig gaaf. Et güng heel good en wy hebt ons beste dån, dat is et vörnaamste”, sea ne upwekte Zwart nåtyds.

Noorske Eerste Minister spölt Pokémon GO in et parlemeant

Der warren al wal mear regearingsleu in de Kamer trappeerd met et spölleke, mer dit moal was et de Eerste Minister zelf.

Erna Solberg, Eerste Minister van Noorweagen, wör oonder een debat trappeerd met Pokémon GO. (foto: Justin Lane/EPA)
Erna Solberg, Eerste Minister van Noorweagen, wör oonder een debat trappeerd met Pokémon GO. (foto: Justin Lane/EPA)

Erna Solberg, de Noorske Eerste Minister, wör trappeerd met et spelleke Pokémon GO tiedens een debat in et Storting, et Noorske parlemeant. Det zee gek is op et spölleke is gin niejs. Tiedens ne offisjele reaize noar Slowakieje gung zee der ook al tuskenoet um et spölleke te spöllen. Ze zea tegen verslaggewers at ze gearne een antal van öare 10km-eier wol loaten oetkommen.

Erna Solberg, eerste minister van Noorweagen, spölt Pokémon Go in et Parlemeant. (foto: Tom Henning Bratlie/Klassekampen)

Et is zelfs neet et eerste moal at Noorske politieker met et spölleke snapt wordt in et parlemeant.

De leadster van de Liberale Partieje, Trine Skei Grande, spöllen et tiedens ne gaddering oawer nasjonale zekerhead verleden Augustus, toen as de Pokémon GO-manie et slimst was.

Dreemoal roaden wee as der an et woard was toen as Solberg drok was to catch ‘em all? Juust, Grande zelf.

@eivindtraedal @erna_solberg hun hørte nok hva jeg sa 😉 vi damer klarer to ting samtidig veit du.

Grande kon der zelf wal umme lachen en tweeten: “Zee heurn genog van wat ik zea. Vieleu vrouwleu köant twee dinge tegelieke, wee’j wal.”

Volgens et Noorske TV2 zea Solberg: “Ik deanke at Trine et wal kan lieden det ik et spölleke lösdeed toon as zee doar steund.”


Duur Elena Cresci
Woonsdag 5 oktober 2016
Welle: TheGuardian.com

Good niejs vuur zoepzäkke – vorskers oontwikkelt alkoholvervanger

Action Press/Rex Features
Action Press/Rex Features

Hey Brakjanzen! Good niejs. Ne plearparty hef meestentieds ne boonkende kopzearte en jengelende spiejeritus as gevolg. Mer duur vervangers vuur alkohol kön iej binnenkort partymachen en roes hebben zoonder rouw.

Wee zik op nen vochtvroliken oawend noa een tweede mixdreanken töt nen daarden of veerden löt oawerhalen, krig vake den aanderen dag de rekkening: ne fleenke kater met et hele pretpakket an kopzearte, zweten en duurloop, woer as iej nog wal twee deage plezeer met köant hebben. Dit joarhoonderden-oolde probleem kan binnenkort töt et verleden heuren. Nen Britsen gelearden hef stöfkes oetdacht dee as op alkohol liekt, mer zoonder de vervelende biewaarkingen.

Professor David Nutt, Neuropsycho-pillendreeier bie et Imperial College van Londen hef stoffen oonder den naam “alcosynth” maakt dee as de positieve biewaarkingen van alkohol noabootset, zoonder det iej der den aanderen dag todderig van zeent. Op 90 stöfkes hef hee inmiddels pateant anvroagen.

Twee van disse waarkstöfkes geewt völbeloawende oetkomsten en wordt op dit ogenblik nog nöader test, leut Nutt de Britse kraante Independent weten. As et an um lea, zat tegen et joar 2050 in alle alkodreanks zin stöfke, in stea van etanol.

Neet-giftig roesmiddel
Nöast janeawer en whiskey konnen volgens um in et vuurliggende mixdreanks zoonder problemen dreunken worden. Zoonder skade an et härte en den leawer wat iej bie alkohol hebt. Et nieje roesmiddel zol volkommen gifloos wean.

“Vie weett al nen hoop oawer de waarking van alkohol op de harsens. Det hebt vie de leste 30 joar good noavorsket,” verkloart den farmakoloog. Rechtevoort weett vie woer as de positieve biewaarkingen in de harsens vandan komt. De nieje stoffen köant dee ook wier ansprekken, en de verkeerde delen umzealen.

Nöast roken en zwoarhead is alkohol ene van de grötste risikofaktoren vuur zeektes en staarfgevallen. Nutt meant at de leu verdan drokker wordt met gezoond leawen en det binnenkort den klassieken alkohol taboe wörd. Den wetenskopper meeldet at de draankindustrie zik hieroawer al tien joar de harsens pienigt. Töt non too wussen ze nog gin oetvlocht.

Verbetterden “Alcosynth”

Al vuur vief joar terugge gavven et al de eerste berichten at “Alcosynth” oonderzocht wör. Toen warren ze vuural drok met stöfkes dee as bie Benzodiazepine of zelfs Valium heuren. Dee harren wier aandere biewaarkingen en nog iets aanders: ze waarken slim verslawend.

De niejste middelkes stoat wied van disse stofgroep. De formules wordt akelig good bewaakt in verslöttelde kasten. De strenge vuurskriften vuur geneasmiddelen vuurkomt at den eersten besten halfbakken barman zelf met katerloos bocht ankeump.

De eerste tests stemt Nutt tevreaden: zinne middelen hebt ne inbouwde beperking. Iej köant der ginnen oawerdosis van innemmen. Iej köant zoepen wat iej weelt, iej wordt neet slimmer dikke as van vief glazen staarken draank.

Samen met nen koppel aandere gelearden probeert Nutt non de Britse regearing umme te kuieren. De gevoaren van de nieje stoffen zeent wezenlik meender as dee van oonzen hudigen alkohol.


Duur Mario Lips
25 september 2016
Welle: Die Welt

13 readenen woerum iej bie et lokale muziekkorps mut

12890876_971135702940242_1786354994127123723_oBie Wearldsproake.nl lusteret vie allens van Bach töt Gridlok, van Rihanna töt Slavko Avsenik, van AC/DC töt Oscar Peterson en van Martin Garrix töt Morgan Heritage. Woer as disse brede interesse wegkeump? Al joaren sleppet vie in et lokale muziekkorps met oawer de stroate. As et good was vuur volk as Bill Clinton, Gwen Stefani, Aretha Franklin en Samuel L. Jackson, is et ook good vuur oe. Doarumme hier 13 readenen um bie et muziekkorps te goan.

1. Iej wordt nen anpakker.


Legt det striekbot an de kaante en komt van oewe luie breikoonte. In et korps lear iej optreaden, flexibel wean, duurgoan, ummegoan en samenwaarken met aanderen: net wat iej neudig hebt in een bedrief.

2. Iej kriegt gezoondere harsens.


Duur muziek te learen, oontwikkel iej de harsendelen vuur sproake en redenering, mer ook vuur kreatief deanken en probleemoplössing. Oonderzeuk wis doarbie ook een verbaand oet tusken muziek en ruumtelik inzicht; onmisboar bie van allens en nog wat. Van rekkenkeunde töt et klook inpakken van nen auto vuur ne reaize. Studeanten dee as muziek maakt, doot et better bie tests en hebt heugere siefers.

3. Iej kriegt zelfvertrouwen duur zelf-oetdrukking.

Hach, dee middelboare skole… zwarte reande um de ogene, kettens an de knippe, dee doodsköppe op oew shirt… Nee, muziek learen helpet oe neet langs alle misdoaden tegen de mode. Mer et gef oe wal ne oetloatkleppe um oezelf es fleenk te loaten goan. Iej leart zeute troanentrekkers, joaren ’80-krakers, sopperigen funk, et Super Mario-deunke… Zelf-oetdrukking gef oe zelfvertrouwen in den tied van oew leawen de’j et et hardste neudig hebt. Doar he’j in oew volgröaide leawen op alle meugelike wiezen gemak van.

4. Iej leart wat et is um bie ne groep te heuren.

Ken iej iemand in nen muziekkorps? Heur iej vaste van alle feestkes dee as ze samen hebt. Alle kneuterige inside jokes. Zo as ze grienzet as iemand in de groep een flauw muzikaal geintjen oethaalt oonder et spöllen. Of zo as ze mekaar helpet as der ne verbouwing is. ‘Er is er een jarig’ vuur mekaar spölt. En dan zingt “oh wat zijn we blij, niet omdat ie jarig is, maar om de zuiperij”. Muziekleu komt vuur mekaar op.  Samen vort ze nen groten kracht. Det geveul helpt öar in allens in et leawen. Doarnöast heb iej gewoon nen onmeundigen bult wille met mekaar!

5. Iej leart muziek begriepen.

Muziek studeren is neet bloots toonladders en noten learen. Et is les in geskiedenis, kultuur en keunst zo as iej op skole nooit ehad hebt. In ieder geval neet zo in et echt.  Een korps maakt oe een vollediger meanske met nen brederen kiek op de wearld. Iej köant op feestkes nog es oawer wat aanders kuiern as auto’s of et waark. En iej kriegt ne riekere Spotify-lieste.

6. Iej leart det iej deel zeent van een grötter geheel.

Der zit gin “Ik” in et woard “KORPS”!  In een muziekkorps lear iej samenwaarken um een better resultaat te halen. Iej leart wat teamwork is. Oewen inzet telt liek zovölle as van aanderen. A’j neet oefent, mut de rest op oe wochen. Doarumme mut iej oe inzetten. Perfekten les vuur op de waarkvloer, of in oewe familie.

7. Iej komt de skaamte vuurbie.

Want päkke. Den stoeren jongkearl op de tromme en dee woondermooie fluitspölster met dee deepblaauwe ogene trekt allemoal denzelfden vörmelozen zak an. Uniformen zeent non eenmoal neet vuur op de catwalk. Et maakt oe uniform, een geheel. En as iederene der zo bielöp, dut et oe niks wat nen aander der van dech. In nen groep val iej toch neet op. Lekker belangriek! En trouwens, der zeent hele badass päkke bie.

8. Iej leart duurzetten.

Dit woard mut aait in heuwdletters met een blearteken der achter: DISCIPLINE! Bie korpsleaders kön iej neet ouwehoeren oonder de repetisie. Of verdoezelen det iej neet oefend hebt, duur oe te verskoelen achter oewe instrumeantmöage. Et vaalt meteen op. Iej leart oe gedreagen en oe inzetten. Iej mut der wat vuur doon, want et geet neet vanzelf. En et is ook nooit zomear good noa één keer. Een korps leart oe den kop der bie hoolden. Ondaanks alle ofleading.

9. Iej kriegt oethooldingsvermeugen.

Woerumme zeent bloemencorso’s toch aait in et zommer? Et dikke pak oademt neet. En iej slept oe nen pokkel met det stukke kopper. Doarbie mut iej ook nog poesten in det apparaat en tuskenduur locht happen. Of as iej nen taptoe loopt, mut iej regelmoatig gas gewen um op tied in et volgende showfiguur te stoan. Nen optocht van 2,5 uur met ne tromme van 10 kilo um den nekke? Good vuur de rugge. Völle leu vergett det iej vúúr den taptoe al moanden oefend hebt, dus ook al met den toeter of dee tromme slept hebt.

10. Iej weet wat toowieding is.

Iederen woonsdagoawend geet allens an de kaante, want muziek! Toovallig jöarig op den oawnd? Kuiervolk mut mer wochen in thoes, want muziek! De kameröa vroagt vriedagoawend of iej met goat noar et kafee. Kan neet, want ik hebbe een optreaden. Vuurtieds sleppen met instrumeantkoffers, noatieds anhanger wier oetpakken. Op vakaansie? Stökke en oefenpleanken met in den koffer!

11. Iej maakt aanderen blie.

Muziekmaken doo iej nooit allene vuur oezelf. Volk langs de kaante met zeen daansen met keenderkes op de skoolders, nen glimlach op et gezichte. Leu met zeen grooven as de drumline nen vetten cadence spölt. Doar geet et umme.

12. Iej kriegt der gewoon nen machtigen kick van.

12. Et gef oe ne basis vuur alle aandere muziek.

Ken iej den kearl hierboawen nog? Vúúr at Steven Tyler met Aerosmith wearldberoemd wör, spöllen hee trompet in et lokale muziekkorps. Just sayin.

Na, oons ducht as vie oe readen genog hebt egewen um oe vandage nog bie et lokale muziekkorps an te melden. Ze köant oe good broeken!

 

Zo kön iej vaals spöllen bie Pokémon GO

Pokémon GO. (foto: iflscience.com)

Dokters prezen Pokémon GO umdet et volk in de bene kreeg en boetenshoes (ondaanks as ze vasteplakket an öare smartphones zitt). Völle leu zegnt zelfs op sosjale media at et augmented realityspelleke (augmented reality beduudt umgewingsoetbreaiding) öar van öare nearslachtigheaid en angsten ofhelpet.

Nöast as iej in de echte wearld mut roondwaandelen um Pokémon te vangen, kön iej ook eier zeuken dee as oetkomt as iej ne bepoalde strekke lop hebt. Toch hebt wat Snorlax-achtige spöllers et neudige beweagen umzeald.

Dissen video van Rusty Cage löt zeen wodöanig as iej et GPS-systeem, wat oewen loopofstaand met, op den biester brengt. Ennigste wat of iej neudig hebt is nen platenspöller of nen plafondventilator.

In de video verteelt hee: “As et dreeit, löp minnen Avatar harsenloos roond in kringskes, woermet as mienen reaisofstaand tooneamp en de eier rapper oetkomt.”

Wat oonderskriewers bie den video meant at de GPS neet nauwkurig genog is um dee kleane ofstaand te herkennen, mer et hef de GPS wal bie de benen in wat vuur richting at den spöller kik.

Probeert et zelf mer es, as iej zo onearlike zeent.


Duur Tom Hale
iflscience.com
13-07-2016
Welle: http://www.iflscience.com/technology/people-have-already-figured-out-how-to-cheat-at-pokmon-go/

Filmoordeel: Den niejen Jungle Book vlamt

Plakkoat van Jungle Book 2016
Veer stearns review
weardering: 4/5

Et is filmmaker Jon Favreau elukket: de live-action animasiefilm Jungle Book (2016) oawertreft op völle peunten den oolden tekenfilm van Disney. Iej zett met de wille et keukelige 3D-brilleken op, vleegt duur een dikbegröaid oerwoold en swingt vanzelf met met den oawerbekeanden jazz-klassieker Bear Necessities.

(filmweardering geet wiedter oonder trailer)

Et verhaal in et kort
Et meanskenjoonk Mowgli wörd in et oerwoold groot ebracht duur nen koppel wolven. As den meanskenhatenden tieger Shere Khan det verneamp, dut hee der allens an um Mowgli dood te kriegen. Umdet ginnen wolf et tegen nen tieger kan opnemmen, mut Mowgli et wolvenkaamp verloaten en terugge noar zin egene soort, et meanskenkaamp. Den wiezen zwarten panter Bagheera en den zorgelozen bear Baloe helpet um doarbie.

Topspöllers
De ennigste echte rolle is vanzelfs vuur et meanskenjoonk Mowgli, den as onmeundig knap duur den 12-jöarigen Neel Sethi wörd espöld. Sethi hef in den film ginne direkte tegenspöllers, woerduur as et spöllen en inleawen dubbel zo lastig is. Op de set warren der dan wal poppenspöllers, mer et echte waark mos hee vanoet zikzelf doon.

(filmweardering geet wiedter oonder foto)

Den 12-jöarigen Neel Sethi spölt nen indrukwekkenden Mowgli. (foto: legiaodosherois.com.br)

Stemmen
Vuur et geveul van den film mu’w toch ook de stemmen van de deers neet vergetten. Doarvuur hef filmmaker Favreau een blik stearspöllers lös etrökken: Idris Elba (tieger Shere Khan), Ben Kingsley (panter Bagheera), Bill Murray (bear Baloe), Scarlett Johansson (slange Kaa), Lupita Nyong’o (moderwolf Raksha) en nog ne hele riegel mear. Disse akteurs weett met öare stemme de deers echt te loaten leawen en geewt ze karakter met.

Kiekgenot
Rauzen duur de jungle is natuurlik nen perfekten umstaand vuur 3D. Loat doar non juust et visuele spektakel met anvangen: Mowgli mut learen jagen en vlög tusken täkke duur, oawer boomstämme, grös en busken. Et oerwoold, de savannes, de höare en beweagingen van de deers, et zut der allemoal eawen indrukwekkend en fien oet. Duur de rieke details en klurenpracht verget iej geheels det et allemoal komputerwaark is. Et 3D-waark dreg hier stewig an bie.

Ondudelik doelpubliek
Et mag dan misskien wal neet, mer ne vergelieking met de vurige Jungle Book van Disney lig natuurlik vuur de haande. Det löt zeen at in de versie van 2016 et doelpubliek neet helemoal heelder is. Den oolden tekenfilm is vuural een plezerig geheel wat met leedkes en gräpkes an mekaar haank. Jungle Book 2016 hef redelik wat spanning en geweeld, en is doarumme geschikt vuur 12 joar en eulder. Et verhaal geet redelik liekoet verdan met weanig plotdreein. Good te volgen vuur keender, neet heel oetdagend vuur groten. Mer det kan der ook an liggen at et verhaal al zo oold is.

Slotsomme: et kieken weard!
Goat der hen vuur et oawerweeldigende visuele spektakel en et oolde verhaal wat in een prachtig niej jäske stökken is. Disney hef et wier es vuur mekaar.

Veer stearns review

4 oet 5 skeelden.