Apple hevt persöönlike inhold, so as kuntakten en steydes, döärgeaven an een bedryv wat de språkherkenning van Siri must verbeateren. Dat höyrden Nu.nl van twey naamlose brunnen dee as der by betrökken warren.

Verleaden weake kreag de groute techmaker al den bård der af ümdat persöönlike saken, töt an seks en drugshandel too, wördden upnöämen en bruked vöär verbeatering van de virtuele hülpe. Selv beweyrden se dat Apple dan wal medlüsterden, mär dat den Apple-ID, den persöönliken anmeldkode, der neet by med esünden wör. Nå dat et uutköäm, skeidden Apple der med uut.

Mär nu blikt dat de gespreaken toch an et ID te koppelen sint, skrivt Nu.nl. De kuntaktenlysten en lokatys wordet medstüürd üm te kyken of Siri et wal good hevt, segt nen neaderlandsken old-wedwarken van et yrske GlobeTech, wat oaver de analyses geyt.

“As der eyne segt: “Hey Siri, wat vöär weader kryget wy morgen?”, müt wy kyken of Siri der de jüüste steyde wal by neamt, seade de GlobeTech-medwarker. Volgens em wördden de informaty nit bruked üm by personen uut te koamen. Dår hadden se et te druk vöär.

Indringers

Kenners up et gebeed van eygenrüümte en IT seaden teagen Nu.nl at dat vöär möägelike oavertreading nit uutmaket. Et was up wat vöär wyse dan ouk ne indringing van de eygenrüümte.

Apple hevt töt nu to noch nit spröäken up de anklachten.

Apple is ouk nit et eanigste bedryv wat nit good weat üm te gån med de wesselwarking tüsken eygenrüümte en språkherkenning. Eyrder disse månd wör al bekend at Google mangs medlüsterden sunder at lüde dårvan wüsten.