China verplichtet gesichtsherkenning up mobil

Vanaf december müt alle lüde dee as ne nye SIM-kaarte in China neamet instemmen med gesichtsskäns. De nye wet güng verleaden sündag in, skrivt de britske krante The Guardian.

Volgens et chinääske Ministery van Industry en Informaty müt de nye wet de “rechten en belangen van lüde beskarmen”. Et maket chinääske mobile gebrukers en internetters makkeliker te volgen.

Volgens de nye wetgeaving müt telekombedryve “künstklookte en andere techniske middelen gebruken” üm de identiteit van nye SIM-gebrukers te achterhalen. Alle fysike winkels in China hebbet töt 1 december tyd had üm måtregelen vöär de nye wet te neamen.

Mobilgebrukers musten hyrvöär al identiteitspapyren en paspoorten låten seen by et registreren van SIM-kaarten. Vöäle telekombedryve doot al gesichten skännen seyt verleaden jår. Ouk müt chinääsken sik al med öär echte naam en telefoonnummer inskryven as se up sociale mediaplatforms wilt.

Döär de uutbreiding van gesichtsherkenning in China, van skolen töt koncerten en oupenbår vervoor, groit de sörgen oaver informatyveiligheid en eygen instemming.

Verleadne november spanden nen professor een eyrste rechtssaak an teagen et gebruuk van gesichtsherkenning. Volgens professor Guo Bing van Zhejiang Sci-Tech University skendden een safaripark in Hangzhou konsumentenrechten döär syn gesichte te skännen en syne persöönlike gegeavens te bekyken sunder syne tostemming.

China’s ministery van underwys seade in september at se et gebruuk van gesichtsherkenning in skolen sulden indammen. Dat köäm nådat hellige ölders untdekked hadden dat der buten öäre weatenskap ümme by ne universiteit in Nanjing herkenningsprogrammatuur installeerd was. Dårmed wör byhölden of studenten in de les köämen en wo good at se meddeaden.

Wakers vöär menskenrechten meynt at den måtregel weader nen trad nöäger is an ne “dystopiske bewakingsståt”, wårin as chinääske steaden voordan meyr lyket up de Xinjiang-streake. Dår wordet inwoaners steyds bekeaken üm möägelike unrüste en upstand up te spoaren.

verhaal geyt wyder under afbealding

Volgens et ministery beskarmt den regel de inwoaners teagen telefoonuplichting. Dårnöäst sul et döärverkoupen van SIM-kaarten teagengån, wat good was vöär de cyberveiligheid en antiterrorisme.

Up et mikroblog Weibo, den chinääsken teagenhanger van Twitter, sint der vöäle vöärstanders. Eyne skrivt: “Myne identiteit is al es stöälen. Dit is vöär my ne gerüststelling.” Nen ander segt: “Al kümt et te late, ik stå der achter.”

Mär anderen warren der minder seaker van at de nye regel de informatybewaking verstarket. Eyne skriv: “as wetten vöär eygenrüümte nit good upsteld sint … heb y echt et recht nit üm meyr en persöönlikere informaty van de lüde te vrågen. Wy wilt gewoon in ne samenleaving woanen wår as unse informaty veilig is. Wat is dår nu so lastig an?”

Up de vråge of mobile gebrukers de gesichtsskäns wilt undergån segt eyne: “Ik nit. Myn nummer is al döärverkocht. Nu myn gesichte ouk?” Nen ander segt: “Låt uns astubleevt noch wat eygenrüümte oaver.”

“Der is selvs gin klein beaten rüümte vöär vryheid. Allens wördt nåkeaken. Y köänet nit seggen of kesen wat y wilt,” segt nen darden.