Archeologen untdekket oaverblyvsels van grout Maya-paleis in Mexiko
KULUBÁ (MEXIKO) – Mexikaanske archeologen hebbet de oaverblyvsels bloutlegd van een machtig Maya-paleis. Et wördt eskatted up 1000 jår old en ligt ungeveyr 150 kilometer van de turistenstad Cancún. Dat steyt te leasen up de britske krante The Guardian.
Volgens et mexikaanske Nationaal Instituut vöär Antropology en Geskydenisse is et gebouw in Kulubá 55 meter lange, 15 meter breyd en ses meter houge. Et likt ses kamers te hebben.
Et is deyl van ne gröätere steade wårin as et ouk twey woankamers, een altaar en ne groute runde oaven geavt. De archeologen hebbet ouk gravresten upgraeved en hoapet nu dat forensisk undersöök når de bütte meyr informaty gevt oaver de mayaanske lüde dee as der woand hebbet.
Eyne van de höyvdundersökers, Alfredo Barrera Rubio, meynet dat et paleis bruked is in twey oaverlappende mayaanske tydbestekken: tüsken 600 en 900 nå Kristus (laat-klassike tyd) en tüsken 850 en 1050 n.K. (de lätste klassike tyd).
“Van de bouwkündige trekken in disse streake, Noordoust Yukatán, weatet wy fråi weinig. Eyne van unse vöärnaamste taken hyr is dårümme et bestuderen van de bouwkünst in Kulubá, nöäst de beskarming en restoraty van uns kulturele arvgood,” segt hee in nen video den as dår maked is.
“Et is noch mär et begin. We sint noch mär net begünnen met bloutleggen van eyne van de gröätste bouwwarken hyr.” Syne hoape is dat et uuteandelik vöäle besökers geyt antrekken.
De Maya’s bouwden eyne van de gröätste beskavingen van et westelike halvrund. Öär ryk beslöäg sowat heyl Middenamerika, wat nu Mexiko, Guatemala, Belize en Honduras is.
In öäre steaden hadden se piramidetempels en groute steynen gebouwen. Se deaden buren en kenden metaalbewarking, legden kloke bewateringssystemen an en hadden een eygen skrivt wat düt denken an de hieroglyfen van de Egyptenaren.
Mär tüsken 800 en 1000 n.K. löäp de beskaving üm unbekende readenen stark terügge. Weatenskappers meynet döär oorlog, klimaatverandering, seekte of politike stryd. Toch hölden een paar steaden et länger uut, so as Chichén Itzá, wår as Kulubá ouk under leak te vallen afgånde up disse upgraevingen.
De upgraevers oaverweyget nu üm et wold deyls weader terüg te låten groien, üm een paar van de wat fragilere bouwwarken teagen et weader te beskarmen. “Döär böyme up bepålde steades weader terügge te poaten, beskarmt se de skilderingen up een paar gebouwen teagen sünlecht, wind en reygen,” seade Natalia H Tangarife, eyne van de archeologen.
