Räpper Kanye West nöömt sik presidentskandidaat Vereynigde Ståten 2020
Den räpper gebröäk den amerikaansken Unafhangelikheidsdag vöär syne ankundiging, mär of hee der al officieel papyrwark van maked hevt is nit düdelik. Dat steyt te leasen up The Guardian.
Net as y meynet at 2020 noch nit gekker kunde, stelt sik räpper Kanye West kandidåt vöär de presidentsverkesingen van de Vereynigde Ståten.
Den unwårskynliken uutdager van Joe Biden en van Donald Trump, wår as hee nen uutespröäken vöärstander van was, greyp den amerikaansken unafhangelikheidsdag an üm syne verraskende ankundiging up Twitter te setten. Nen storm up sociale media volgden.
“Wy müt nu de belovte van Amerika wårmaken döär up God te vertrouwen, unse visy te vereynigen en an unsen tokomst te bouwen. Ik stelle my kandidåt as president van de Vereynigde Ståten ,” skreav West.
Syne vrouwe, Kim Kardashian West, reageerden up den tweet med ne amerikaanske vlagge.
Wo seriöös et was is nit düdelik, med noch veer månd te gån vöär den verkesingsdag up den 3. november. Ouk was nit düdelik of den 43-jöärigen al officieel papyrwark inedeend had üm by up de stembiljetten te kommen. Den anmeldingsvrist vöär unafhangelike kandidåten is vöär vöäle ståten noch nit vöärby.
Mär nå at twyvelachtigen sakenman en TV-steare Trump in et Witte Huus tröäk in 2016, stünd et idee van Kardashian as presidentsvrouwe meskeen wal in de stearns te leasen.
West, nen populären räpper med 21 Grammy’s up name, kreag subit byval van Elon Musk, den höyvdman van den elektrisken automaker Tesla en ouk bekend üm syne donöärdige uutbörstingen. Den tweeten: “Ik stå vulleydig achter u!”
In ne bizarre untmoting in 2018 besöchteden West en syne vrouwe Trump in et Witte Huus üm te küren oaver verbettering van et amerikaanske gevangenisstelsel. West had dotyds ne rode pette up med ‘Make America Great Again’ der up. Hee seade dinge as “motherfucker” en “uneyndige bargen heylal.” Hee seade at Trump em as “Superman” löät völen, vlöyg em üm den hals en seade dat hee “wys was med dissen kearl hyr.”
Up de vråge of West ne tokomstige presidentskandidåt kunde weasen, seade Trump: “Kan heyl good weasen.” West antwoordden dårup med: “pas nå 2024. Maakt u nit druk oaver den tokomst. Allens wat wy hebbet is vandage. Wy hebbet enkel vandage.”
Toch hevt den räpper al eyrder et idee upperd. In januari van verleaden jår deade hee der nen tweet uut med enkel et getal “2024”. Et wör wyd en syd eleasen as ne ankundiging van syne presidentskandidatuur in dat jår.
Verleaden weake kreag West noch nen houp kritik oaver sik hen nå syne uutspraak dat hee “sou gröytsk was up syne mooie vrouwe Kim Kardashian West dat see nu officieel miljardäär was.” See had vöär souwat € 200 miljoon ’n andeyl verkocht van öär skounheidsmark. Van de andere kante kreag hee vöäle lof vöär ’n nummer oaver racisme en gelöyv.
As et döärgeyt slut West an by ne lange tradity van unafhangelike kandidåten dee tüsken de strakke oaverhearsking van de Demokraten en Republikeinen ståt.
