Trump segt reise når Daenemarken af: EM wil Gröönland nit verkoupen

Den amerikaansken president Donald Trump hevt syne reise når Daenemarken afsegd en synen afspraak med de daenske eyrste minister uutsteld, nå at see seade at Gröönland nit te koup was.

Nå nen trip når Gröönland verleaden sündag nöömden Eyrste Minister Mette Frederiksen de koup van et halv-unafhanglike Daenske eiland “ne absurde diskussy.”

Verslag van de britske krante The Guardian oaver Trump syne plannen üm Gröönland te koupen. (YouTube/Guardian News)

Verleaden dinsdagoavend tweetten den president van de Vereynigde Ståten dat, ümdat de eyrste minister “de anskaf van Gröönland nit besprekken wul,” hee de untmoting had uutsteld.

“Daenemarken is een heyl speciaal land med fantastiske lüde, mär ümdat Eyrste Minister Mette Frederiksens segt dat se ne oavername van Gröönland nit wil besprekken, stel ik unse untmoting van oaver twey wekken uut når een ander mål,” skreav he.

Dinsdagoavend wör de afspraak officiääl afsegd. “Vöär nu is et besöök an Daenemarken afsegd,” seade Judd Deere, nen woordvoorder vöär et Witte Huus teagen de New York Times.

Et besluut kümt nådat Trump syn vöärstel üm Gröönland te koupen breyd afskreaven wör as unuutvoorbår en unwelkoam. Lokale inwoaners seaden dat et een ‘idioot’ idee was en ‘neaderbügend’.

Gröönland is een halv-unafhanglik eiland under daensk bestüür.

Frederiksen, den as up et eiland was üm by te küren med Kim Kielsen, de premier dår, seade sündag at Gröönland nit verkocht worden kun ümdat Daenemarken der gin baas oaver is.

“Gröönland is nit daensk. Gröönland is gröönlandsk. Ik hoppe med alle macht at dit nit seriöös is,” seade see.

Et idee is al es eyrder opperd: in 1946 deade de VS een bod van $100m vöär Gröönland, nå at Daenemarken nen landuuttuusk med Alaska afweys.

De VS wüst later ne oavereynkoamst te teakenen vöär Thule, ne luchtmachtbasis in et noorden van Gröönland bestemd as tankstation vöär langeafstandsbommenwarpers.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.